Fotokorrespondenciya

Jurnalistika tarawında fotokorrespondenciya janrı keyingi jılları payda boldı. Dáslepki dáwirde fotokorrespondenciyanı fotozametka hám fotoreportajǵa usatıp júrdi. Bunıń fotoreportajdan ózgsheligi, ol qanday da bir waqıyanı sezip, túsindirip baradı. Al, fotozametkadan ayırmashlıǵı - bul janr bir fakt penen sheklenbey, bir neshe fakt dógeregindegi baylanıstı qamtıydı. Oǵan turmıstı súwretlep kórsetiw emes, al dálillep kórsetiw wazıypası júklengen.

Fotojurnalistikanıń basqa fotozametka, fotoreportaj, fotosúwretleme sıyaqlı janrlarında berilgen súwrettiń tek ayırım waqıyalardı ashıp kórsetilse, fotokorrespondenciyada oqıwshılarǵa túsinik berilgen informaciyanı ǵana baspaǵa jiberedi. Fotokorrespondenciyada jámiyetlik turmıs fakti haqqında xabar beriw emes, faktlerdi túsindiriw, ulıwmalastırıw meseleleri janrdıń ózgeshelikleri esaplanadı. Analiz jasaw, tallaw bul janrdıń qásiyetlerine kiredi. Bul janrda da shınlıq hár terepleme ashıladı. Ulıwma aytqanda, fotozametkada óndiriń jetiskenlikleri, fotokorrespondenciyada miynet nátiyjeleleri kózden ótkeriledi.

Fotokorrespondenciyanıń maqseti - sociallıq praktikanıń hár qıylı tájiriybelerin ashıp kórsetiw. Bul janrdıń tiykarǵı maqseti, faktti dálillew emes, al, oqıwshıǵa úlgi bolarlıq faktti táriplew hám súwretlew bolıp esaplanadı. Onıń teması hár qıylı.

Kúndelikli baspada faktke ashıq analiz jasaǵan hem avtordıń óz bahasın bergen fotokorrespondenciyanı kóriwge boladı. Bunday publikaciyalar reportaj túrinde orınlanadı. Belgili temaǵa arnap faktlerdi tallaw, olardı sistemalastırıw, publicistikanıń ideyasın túsindiriw avtordıń oy-pikirin biliwge jerdem beredi. Analiz bunday fotokorrespondenciyada basım. Fotokorrespondenciyanıń bunday túrine operativlik fotokorrespondenciya deymiz.

Tiykarında faktler turǵan fotokorrespondenciya operativ signal retinde qollanılıp, jetiskenlikti taratıw, kemshiliklerdi joyıw maqsetinde isletiledi. Turmıstaǵı sheshilmegen sorawlar, problema bolıp qaladı. Sol problemanı ashıp beriw ushın avtor tek faktke súyenbey, onıń baylanısın, áhmiyetin kórsetiwi kerek. Bunday fotopublikaciyalar avtordıń fakt tuwralı oyların, pikirin, bahasın, usılların kóriwge boladı. Fotokorrespondenciyanıń bunday túrlerine problemalı fotokorrespondenciya deymiz.

Baspasóz betlerinde adamzat jámiyetiniń, tek ǵana bir tarawında emes, fotokorrespondenciyanıń, hámme temanı qamtıw múmkinshiligine iye. Bunday fotopublikaciyanń súwretlew obiekti etip adamnıń materiallıq, ruwxıy jetiskenlikleri hám waqıt alınadı. Fotokorrespondenciyanıń bunday túrine sholıw fotokorrespondenciya deymiz.