Iyjan

Iyjan — qaraqalpaq milliy taǵamlarınıń bir túri.

Iyjan

Iyjan tayarlawdıń da ózine ılayıq usılları bar. Solayda, bunı bir úyrenip alǵan adamǵa hesh qıyınshılıq tuwdırmaydı. Diyxanshılıq tarawında házirgi kúnde de kóplegen dánli eginler qatarında gúnji egiw hám onıń zúráátinen ónimli paydalanıw xalqımız turmısında keń orın alǵan. Bul egin túrin jeke xojalıqlar kóp egedi. Ásirese, Respublikamızdıń arqa hám oraylıq rayonlarındaǵı diyxanshılıq ónimleri arasında kóbirek ushıratamız. Iyjandı islew ushın júdá kóp azıqlıq zatlar talap etilmeydi: suwırıp tazalanǵan gúnji dáni, qatqan nan untaǵı (kelige túyilip untaladı), pecheniye qaldıqları (júdá shárt emes), qum sheker.

Tayarlanıwı

1. Iyjan tayarlaw waqtında gúnji juwılıp, qazanǵa salıp bir qaynatıp alıp, soń jayıp keptiriledi, kepken gúnji qazanda úzliksiz bılǵap quwırıladı, quwırǵan waqıtta kúyip qarayıp ketpewi kerek.

2. Quwırılǵan gúnji kelige salıp mayı shıqqansha, ezilip túyiledi.

3. Nan óz aldına kelige salıp túyilip tayarlanadı. Geyde nan jumsaqlaw bolsa, gósh maydalaǵıshtan (myasorubka) ótkerip, keptiriledi.

4. Túyilgen gúnji hám nan untaǵın salıp, mólsherlep qumsheker salınıp, bári aralastırılıp kelide túyiledi. Túsi qońırlanıp iyjan qálpine kelgen waqıtta iyjan tayar dewge boladı. Iyjandı dástúrxandı bayıtıw hám den-sawlıqqa paydalı tárepleri kóp bolıp vitaminlerge bay bolǵanı ushın, taǵam túrinde kóbirek paydalanǵan jaqsı. Ramazan ayında oraza tutqanlar tańǵı sáhárlik waqtında iyjan taqanın jese, keshke deyin toqlıq beredi.