Kegeyli kanalı

Kegeyli kanalı - Qaraqalpaqstan Respublikasında qurılǵan irrigaciya arnası. Ámiwdáryadan baslanǵan Qızketken kanalınıń shep tarmaǵı (Qızketken kanalı 25 km de Quwanıshjarma hám Kegeyli kanallarına ajıraladı). Uzınlıǵı 56 km. Suw ótkiziw imkániyatı 115 m3/sek. 1935-jılda iske túsirilgen. Keyingi jıllarda kanal tolıq rekonstruciya qılınıp, 1963-jılda kanaldıń 36-km de Mayjap hám 55-km da Besjap gidrouzelleri qurıldı. Kegeyli kanalınan Estekjap, Qarasıyraq, Shaqarıq hám basqa kishi kanallarǵa suw beriledi. Suw kemeyip ketken jıllarda Kegeyli kanalına Qattıaǵar kanalınıń eski ózeni arqalı Ámiwdáryada qurılǵan nasoz stanciyası járdeminde suw uzatıladı (5—6 m3/s). Kanal suwı menen Kegeyli hám shımbay rayonlarında 30 mıń gektar jer suwǵarıladı, jańa jerlerdi ózlestiriw imkániyatın beredi.