Malxana (roman)

Malxana
Malxana
Negizgi atı	Animal Farm:A Fairy Story
Avtorı	Jorj Oruell
Janr	astarli roman
Mámleket	Ulli Britaniya
Kitap jazılǵan til	inglizshe
Original baspa jılı	1945-jil
Baspaxana	"Secker and Warburg"
Betler sanı	112 bet

Malxana (inglisshe Animal Farm) Jorj Orueldiń metaforaliq til menen jazılǵan, totalitar jámiyetler hám hákimiyattıń buzıwshi tábiyatınıń keskin sın pikiri bolıp xızmet etetuǵın, kitapqumardi tereń oylandıratuǵın hám hár túrlı mánislerge bay allegorik (astarlı), siyasiy-satirik roman. Roman dáslep Ullı Britaniyada 1945-jılda baspadan shıǵarıldı. 1996 -jılda bolsa ótken zamanda jazılǵan dóretpeler ushın beriletuǵın Retro Hugo sıylıģı menen siyliqlanģan.Roman "Stalinizmge" qarsı sın pikir retinde jazılǵan. Ózin hár qanday totalitarizmge qarsı sotsial-demokrat retinde tanitqan Jorj Oruell romanda SSSR mámleketiniń payda bolǵannan keyin mámleket ishinde júz bergen waqıya hám hádiyselerdi yumor hám astarli jol menen ashıp beredi.

Malxana shıǵarması baspadan shiģarilģan dáwirde túrli tartıslarǵa sebep bolıp, qattı sın pikirge de ushradı."Stalinizmge" sın kózqarasta jazılǵan bul dóretpe sebepli ekinshi jáhán urısındaǵı awqamlasi SSSR menen „oń“ baylanıslarǵa ziyan jetiwin qálemegen Britaniya húkimeti bul shıǵarmaǵa ayırım cenzuralardı kiritedi. Roman ushın multifilm islenip atirģan da CIA tárepinen ózgertirilgenide aytılǵan. Romanniń túp mazmuni saqlanģan film 1999 -jılda súwretke alınadı.Malxana Romanı Pink Floydtıń "Animals" muzıkalıq albomi ushın ilham deregi bolıp xızmet etedi.

Qisqasha mazmuni

Fermada bolıp ótken waqıya ádalatlı hám teń huqiqlı jámiyet ornatıw oyi menen óziniń aldınǵı zalım ferma iyesin awdarıp taslaǵan haywanlar toparı átirapında júz beredi. Idealistik shoshqa, Ǵarrı Mayor basshılıǵındaǵı haywanlar " Barlıq haywanlar teń" mantrasi menen Jeti Arkon dep atalǵan bir qatar principler astında birlesedi. Biraq, waqıt ótiwi menen kúsh dinamikası rawajlanadı hám Napoleon hám Snoubol basshılıǵındaǵı shoshqalar áste-aqirin basqarıwdı qolǵa kiritip, fermaǵa tiykar salınǵan revolyuciyalıq principlerdi buzadı.

Oruelldiń haywanlardan qaharman retinde paydalanıwdı tańlawı hár tárepleme tereń oylanǵan bolıp, ol kitap oqiwshilarģa siyasiy haqıyqatlıqtan alıslaw imkaniyatın beredi hám antiutopik dóretpe temaları haqqında qalıs oylawǵa jol ashadı. Jazıwshı haywanlar jámiyetiniń túrli qatlamların, atap aytqanda, proletariat, ziyalilar hám húkimran klasslar ómirin súwretleydi, bul kıtapqumarlarǵa fermadaǵı waqıyalar hám jámiyettegi húkimet ushın gúresler arasındaǵı uqsaslıqlardı parıqlawda járdem beredi.

Shoshqalar óz qadaǵalawın kúsheyter eken, olar áste-aqirin ózleriniń jeke máplerine mas túrde Jeti Arkondi qayta jazadı hám totalitar rejimler tárepinen qollanılatuǵın úgit-násiyatlaw hám manipulyatcıya menen paralellik jaratadı.