Perxan Allambergenova

Tuwılǵan sánesi	19-iyul 1975(1975-07-19) (49 jasta)

Tuwılǵan sánesi	19-iyul 1975(1975-07-19) (49 jasta)

Biografiyası

Allambergenova Perxan Qudaybergenovna 1975-jılı 19-iyulda Qaraqalpaqstan Respublikası Nókis qalasında tuwılǵan. Milleti qaraqalpaq, maǵlıwmatı joqarı. 1995-jılı Qaraqalpaq mámleketlik universiteti filologiya fakulteti jurnalistika bólimine oqıwǵa kirip, Ózbekstan Milliy universitetinde oqıwdı dawam ettirdi. 1999-jılda usı universitettiń bakalavrlıq, 2001-jılı magistrlıq diplomın aldı.

Xızmet jolı

P.Allambergenova 1999-2003-jıllarda Ózteleradiokompaniya "Yoshlar" radiokanalında redaktor, úlken redaktor sıpatında jumıs isleydi. 2002-2004-jıllarda Ózbekstan mámleketlik jáhán tilleri universiteti aspirantura bóliminiń kúndizgi bólim aspirantı, 2004-2008-jıllarda Ózbekstan milliy teleradiokompaniyası "Yoshlar" teleradiokanalı "Mádeniy-aǵartıwshılıq, ilimiy-ǵalabalıq hám tálim báǵdarlamaları" redakciyası redaktorı bolıp isledi. 2008-2009-jıllarda Ózbekstan mámleketlik jáhán tilleri universiteti xalıq aralıq jurnalistika fakulteti oqıtıwshısı, dekan orınbasarı, 2009-2012-jıllarda Ózbekstan milliy teleradiokompaniyası Teleradiobaǵdarlamaların monitoring hám analizlew bólimi jetekshi qánigesi, 2012-2013-jıllarda Ózbekstan milliy teleradiokompaniyası Qaraqalpaqstan Respublikası teleradiokompaniyası direktorınıń orınasarı, direktorı bolıp isledi. 2012-2013-jıllarda Qaraqalpaqstan Respublikası teleradiokompaniyası direktorı orınbasarı, direktorı wazıypalarında jumıs alıp barıwı menen birinshi hayal basshı sıpatında tariyxqa kirdi. 2013-2018-jıllarda Ózbekstan milliy teleradiokompaniyası teleradiobaǵdarlamaların monitoring hám analizlew bólimi Kewilashar kórsetiwleri sektorınıń bas qánigesi bolıp isledi. 2018-2019-jıllarda Ózbekstan jurnalistika hám ǵalaba kommunikaciyalar universiteti úlken oqıtıwshısı, 2019-jıldan Ózbekstan milliy teleradiokompaniyası Teleradiobaǵdarların monitoring hám analiz etiw bólimi Kewilashar kórsetiwleri sektorınıń bas qánigesi sıpatında jumıs islep kelmekte.

Sıylıqları

Miynetleri jaqsı bahalanıp, 2003-jılı "Eń ullı, eń áziz" tańlawı laureatı, 2005-jılı "Jıldıń eń belsendi jurnalisti" tańlawı laureatı, 2005-jılda Qaraqalpaqstan Respublikası Joqarı Keńesi húrmet jarlıǵı hám 2013-jılda Qaraqalpaqstan Respublikası "Xalıq tálimi aǵlası" kókirek belgisin alıwǵa miyasar boldı. Ǵárezsizligimizdiń 25 jıllıǵı múnásibeti menen Ózbekstan milliy teleradiokompaniyası húrmet jarlıǵı menen sıylıqlanadı.

Ilimiy miynetleri

Izertlewshi sıpatında birinshi márte Qaraqalpaqstan televideniesin ilimiy jaqtan úyrenip, "Qaraqalpaqstan televideniesi janrları: tema, jurnalistlik jantasıw, zamanagóy rawajlanıwı" (2000-2006-jıllar) temasındaǵı filologiya pánleri kandidatı ilimiy dárejesin alıw ushın jazılǵan dissertaciyasın 2007-jılda jaqsı qorǵadı. "Jáhán jurnalistikası tariyxı" (2008) sabaqlıǵı teń avtorı, "Telejurnalistika janrları" (2014), "Audiovizual jurnalistika" qollanbaları avtorı. "Dúnya boylap" telekanalında "Qaraqalpaq elinde" dúrkim kórsetiwi avtorı. Sonıń menen birge Ózbekstan Respublikası Kadrlar tayarlaw milliy baǵdarlaması boyınsha jurnalistika jónelisinen birinshi qaraqalpaq magistr jurnalisti.

Dárekler

Ózbekstan Jurnalistika hám ǵalaba kommunikatsiyalar universiteti saytı