Qaraqalpaqstan xabar agentligi
|
Payda bolıw tariyxı:[redaktorlaw | derekti jańalaw]
Qaraqalpaqstan xabar agentligi (QQXA) — Qaraqalpaqstan Respublikasıniń rásmiy hám tiykarǵı xabar agentligi. QQXA 1954-jılı burınǵı Ózbekstan telegraf agentligi - ÓzTAGtiń Qaraqalpaqstan bólimi sıpatında jumıs baslaǵan. Bólim tiykarınan jergilikli gazetalarda basılıp shıǵatuǵın, televidenie hám radio arqalı efirge uzatılatuǵın TASS xabarların hám basqa da rásmiy materiallardı qaraqalpaq tiline awdarıw menen shuǵıllanǵan.
1976-jılı ÓzTAGtiń Qaraqalpaqstan bólimi janında xabar tayarlaw redakciyası shólkemlestirilgen.
Házirgi waqıtta bólim xızmetkerleri tek awdarma menen shuǵıllanbastan, kúnniń eń áhmiyetli temasındaǵı xabar, maqala hám reportajlar da tayarlamaqta. Shtat birligi keńeygen.
Ózbekstan Respublikası Prezidentiniń 1992-jıl 5-fevraldaǵı Pármanına tiykarlanıp, Ózbekstan telegraf agentligi - ÓzTAG Ózbekstan Milliy málimleme agentligi - ÓzA bolıp qayta shólkemlestirilgennen keyin ÓzTAGtiń Qaraqalpaqstan bólimi negizinde Qaraqalpaqstan xabar agentligi shólkemlestirildi. (Qaraqalpaqstan Respublikası Ministrler Keńesi agentliktiń shólkemlestiriwshisi bolıp esaplanadı)
QQXA Ózbekstan Milliy málimleme agentligi arqalı mámleketimizdiń barlıq ǵalaba xabar qurallarına Prezidentimiz hám Húkimet tárepinen qabıl etilip atırǵan párman, qarar hám biyliklerdi, sonday-aq, ayrıqsha siyasiy áhmiyetke iye hám basqa da materiallardı qaraqalpaq tilinde jetkerip kelmekte. Sonday-aq, Qaraqalpaqstan Respublikası Joqarǵı Keńesi, Ministrler Keńesi jumısına baylanıslı rásmiy materiallardı tayarlaydı hám respublika kóleminde bolıp ótetuǵın jámiyetlik-siyasiy, ekonomikalıq, mánawiy-aǵartıwshılıq ilajlardı sáwlelendirip baradı.
Qaysı tillerde alıp barıladı?[redaktorlaw | derekti jańalaw]
QQXA xabarları ózbek, qaraqalpaq hám rus tillerinde beriledi.