Raya Ernasheva
| Tuwılǵan sánesi | 7-yanvar 1953 |
|---|---|
| Qaytıs bolǵan sánesi | 28-yanvar 2022 (69 jasta) |
Raya Ernasheva (Raziyabegim) - belgili shayır, dilmash hám redaktor, Ózbekstan Respublikası Jazıwshılar awqamınıń aǵzası.
Biografiyası
[redaktorlaw | derekti redaktorlaw]Raya Ernasheva 1953-jılı 7-yanvarda Nókis qalasında dúnyaǵa kelgen. 1958-jılı bes jasında Ámiwdárya rayonınıń Nazarxan awılı Berdaq atındaǵı mákan puqaralar orayındaǵı mektepke 1-qaraqalpaq klasına oqıwǵa barıp, 1968-jılı orta mektepti tamamlaǵan. Toǵız-on jasınan baslap jazǵan qosıqları mektep diywalı gazetasında, al baspasózde 1970-jıldan respublikalıq gazeta-jurnallarda, jaslar almanaxlarında basılıp shıǵa baslaǵan. Fizika hám matematika pánine qızıǵıwshılıǵı sebepli Nókis mámleketlik pedagogikalıq institutında usı pánler boyınsha joqarı bilim alǵan. 1993-jılı Xalıq universitetiniń arab tili boyınsha arnawlı kursın pitkergen. 2022-jıldıń 28-yanvar kúni uzaq dawam etken keselleniwden keyin 69 jasta dúnyadan ótti.
Miynet jolı
[redaktorlaw | derekti redaktorlaw]Raya Ernasheva miynet jolın respublikalıq jaslar gazetasında ádebiy xızmetker bolıp islewden baslaydı. Bunnan keyin «Qaraqalpaqstan» baspasında redaktor bolıp 40 jıldan aslam waqıt miynet etip, usı dáwirde hár qıylı pánler boyınsha kitaplardıń sapalı basılıp shıǵıwına belgili dárejede úlesin qosqan talantlı redaktor boldı. 2000-jılı Qaraqalpaqstandaǵı dáslepki balalar hám jas óspirimler ushın «Qarlıǵash» jurnalın ashtı hám onıń shıǵıp turıwına bar kúsh-jigerin sarpladı.
Dóretpeleri
[redaktorlaw | derekti redaktorlaw]Túrli jıllarda shayırdıń «Meniń gúlim», «Bile-bilgenge», «Ómir tolǵanısları», «Silkin, humay yańlı óz qanatında» poeziyalıq kitapları hám balalarǵa arnalǵan «Pal bóbegim sóylese», «Adımlawshı mashina» kitapları, sonday-aq, qaraqalpaq hám ózbek tillerinde «Shıǵarmalarınıń 3 tomlıǵı» (Tashkent, 2010), rus tilinde «Nochnoe puteshestvie» (Moskva, 2015), ózbek tilinde «Saylanma» (Nókis, 2019), qaraqalpaq ádebiyatında bes kitaptan ibarat «Xamsa» (Tashkent, 2020) shıǵarmasın arnawlı kitap etip baspadan shıǵarıp, xalqımızdıń ruwxıy baylıǵınıń rawajlanıwına bar talantı hám kúsh-jigeri menen salmaqlı úles qostı. Ol Ózbekstan Respublikası Jazıwshılar awqamınıń aǵzası.