Shúkirbay Siypatdinov

Shúkirbay Siypatdinov – fotojurnalist, «Qaraqalpaqstan Respublikasına miyneti sińgen jurnalist», 1989-jıldan Ózbekstan Jurnalistleri dóretiwshilik awqamı aǵzası.

Ómiri hám miynet jolı

Shúkirbay Siypatdinov 1962-jılı Shımbay rayonında dúnyaǵa kelgen. Ol óz miynet jolın 1983-jılı respublikalıq «Sovet Qaraqalpaqstanı» gazetasında korrektordıń járdemshisi lawazımınan baslaǵan. Onnan soń «Qaraqalpaqstan» kitap baspası, «Ámiwdárya» jurnalı, «Nókis haqıyqatı» gazetalarında jumıs isledi. Ol 1989-jılı paytaxtımız óz gazetasına iye bolıp, eń birinshi fotokorrespondent lawazımına tańlaw nátiyjesinde jumısqa qabıllanǵan. Ustazları I.Qdırov, K.Orazov hám K.Kimlerden súwretke túsiriwdiń sırların úyrendi. Sh.Siypatdinov tek fotojurnalistika menen shuǵıllanbastan maqala, intervyu, ocherk, feleton janrlarında qálem terbetedi.

Dóretiwshiligi

1991-jılı respublikalıq «Janlan Aral» («Возродись Арал») gazetasında fotoxabarshı bolıp islep júrip, xızmet saparı menen Moynaq rayonındaǵı teńizdiń qurıǵan ultanında qalıp ketken «Kemeler qábiristanı»ndaǵı qayıq, keme, paraxodlardı súwretke túsirip, fotoreportaj tayarladı. Fotosúwretleri «Xalq soʻzi» gazetasında járiyalanıp, bas redaktordıń minnetdarshılıq xatın alıwǵa eristi. Bunnan tısqarı, 1992-jılǵı Bozataw rayonındaǵı «Aspantay» awılındaǵı suw tasqınında da waqıya ornına barıp, ásirese, Qońırat rayonındaǵı «Qızıl jar»daǵı qıyın jaǵdaylardı óz kózi menen kórip, vertolyottan súwretke túsirdi. Fotosúwretleri menen maqalalar tayarlap, gazetalarda járiyaladı.

Jetiskenlikleri

Onıń jurnalistika tarawın rawajlandırıwǵa qosqan miynetleri inabatqa alınıp, 2001-jılı Qaraqalpaqstan Respublikası Joqarǵı Keńesi Prezidiumınıń Húrmet Jarlıǵı menen sıylıqlandı. Fotojurnalistke 2015-jılı «Qaraqalpaqstan Respublikasına miyneti sińgen jurnalist» húrmetli ataǵı berildi.

Ádebiyatlar

Esemuratova S. Fotojurnalistika. 2024