Siyasiy baspana
Siyasiy baspana beriwdiń tiykarǵı xalıqaralıq huqıqıy aqıbeti bunday baspana berilgen shaxstıń mámleket tárepinen beriliw minneti esaplanadı.
Siyasiy baspana beriw menen qandayda bir shaxsqa málim bir mámleket aymaǵında turaqlı jasawǵa ruqsat beriwdi parıqlaw lazım. Óytkeni basqa jaǵdayda mámleket hesh qanday xalıqaralıq huqıqıy minnetleme almaydı.
Kóbinese baspana alıwǵa óz mámleketinde siyasiy jınayatshı esaplanǵan shaxs dawager boladı. Bunday jaǵdayda kóp dawlar júz beredi. Aymaqlıq baspana haqqındaǵı deklaratsiyada tastıyıqlanǵan printsipke muwapıq aqırında usı másele baspana bergen mámleket tárepinen sheshiledi.
Ulıwma jınayat islegen puqaralarǵa siyasiy baspana berilmesligi haqqındaǵı qaǵıydalar ulıwma moyınlanǵan qaǵıyda esaplanadı.
Siyasiy baspana beriwdiń ekinshi xalıqaralıq huqıqı aqıbeti sonnan ibarat, qanday da bir shaxsqa siyasiy baspana bergen mámleket usı shaxstıń huqıqları sırt el mámle-ketlerge burılǵan jaǵdayda kvazidiplomatiyalıq qorǵanıw huqıqına iye boladı.
Siyasiy baspana beriwdiń úshinshi aqıbeti qandayda bir shaxsqa baspana bergen mámleket usı shaxstıń háreket ushın juwapker boladı. Basqasha sóz benen aytqanda, baspana bergen mámleket bunday shaxslar tárepinen qashıp shıqqan mámleketke qarata jınayı háreketler islewge jol qoymawı shárt.
Tikkeley xalıqaralıq huqıq normalar tiykarında shaxstıń baspana huqıqı berilmeydi. Shaxstıń bunday huqıqları ishki mámleket huqıqında óz sheshimin tabadı. Xalıqaralıq huqıq normaları tek mámleketlerdiń belgili topardaǵı shaxslarǵa baspana beriw huqıqın hám basqa mámleketlerdiń usı huqıqtı húrmetlew minnetin tastıyıqlaydı. Eger siyasiy emigranttı baspana izlewge májbúrlegen jaǵday saplastırılsa yaki siyasiy emigrant baspana bergen mámlekette naturalizatsiyalansa, siyasiy baspana tamamlanadı.