Baxıtlı (Shımbay rayonı)

Baxıtlı
Baxıtlı ;
	42°59′23″N 59°40′25″E / 42.98972°N 59.67361°E
Mámleket	Ózbekstan
Respublika	Qaraqalpaqstan
Rayon	Shımbay rayonı
Hákimiyat
• APJ baslıǵı	Raxat Tájimuratov
Dúzilgen waqtı	1953-jıl
Xalıq sanı	7 341 adam
Waqıt zonası	UTC+5
Telefon kodı	+998
	Baxıtlı

«Baxıtlı» awıl puqaralar jıyını yamasa «Baxıtlı» APJ («Бахытлы» аўыл пуқаралар жыйыны, «Бахытлы» АПЖ) — Qaraqalpaqstan Respublikası Shımbay rayonına qaraslı awıl puqaralar jıyını^[1]. Shımbay qalasınan 15 shaqırım uzaqlıqta jaylasqan^[2].

Xalqı

Xalqınıń sanı 7300 ge shamalas. Xalıq, tiykarınan, diyqanshılıq hám sharwashılıq bolıp tabıladı^[2].

1200 den aslam shańaraqta qaraqalpaq, ózbek, qırǵız, bashqurt milletiniń adamları jasaydı^[2].

Tariyxı

APJ ornında Ekinshi jáhán urısı jıllarında «Oktyabrdiń 40 jıllıǵı» kolxozı jaylasqan. 1953-jılı «Baxıtlı» awıl keńesi shólkemlestirilgen^[2].

1971-jılı «Taza qural», «Kommunizm», «Ilich», «Kúnxoja», «Dmitriev», «Partsyezd» xojalıqları birlesigi «Baxıtlı» sovxozı (keńes xojalıǵı) bolıp qayta atalǵan^[2].

1993-jıldan baslap «Baxıtlı» awıl puqaralar jıyını bolıp atala baslaydı^[2].

Aymaǵı

Aymaqta 4 mektep, 2 mektepke shekemgi tárbiya ornı, 1 awıl shıpakerlik punkti, 3 azıq-awqat dúkanlarınan basqa, «Baxıtlı» mashina traktor parki, neft ónimleri, ximiya ónimleri bólimleri bar^[2].

Avtomobillerge gaz hám benzin quyıw tarmaǵı, suyıltılǵan ballonlı gaz jetkiziw beriw tarmaǵı xızmet kórsetedi^[2].

Sonday-aq, 44 fermer xojalıǵı bolıp, awıl puqaraları paxta, ǵálle, palız ónimlerin jetistiriw, bunnan tısqarı sharwashılıq, baǵshılıq, balıqshılıq penen shuǵıllanadı^[2].

Basshıları

Sovxoz bolıp quralǵanda dáslepki direktor bolıp, kóp jıllar boyına Shımbay rayonında awıl xojalıǵınıń rawajlanıwına óziniń pidákerlik miyneti menen úlken úles qosqan Uzaqbay Bekimbetov tayınlanǵan^[2].

Onnan sonǵı jıllarda Qarjawbay Nurlıbaev (1978), Jumabay Jumaniyazov (1984), Baxıt Mámbetmuratov (1990), Marat Allamuratov (1997), Jumabay Sırajatdinov (2002), Polat Nurmanov xojalıqqa basshılıq etken^[2].

1983-jılı «Baxıtlı» xojalıǵınan P. Seytov atındaǵı, «Ilich» bólimleri tiykarında jańa xojalıq dúzildi. Búgingi kúnde ol Pashentaw awıl puqaralar jıyını bolıp ataladı^[2].

«Baxıtlı» sovxozına Baxıt Mámbetmuratov direktor bolǵan jıllarda: 1990-jılı balalar baqshası, 1991-jılı 19-sanlı mektep, 1994-jılı awıllıq shıpakerlik punkti, 1996-jılı 27-sanlı mektep qurılǵanın, tábiyǵıy gaz alıp kelingen. Al, Jumabay Jumaniyazov islegen dáwirlerde (1984) ishki jollar asfaltlandı^[2].

Bul mákan 1993-jıldan baslap «Baxıtlı» awıl puqaralar jıyını bolıp atala baslaydı. Sonnan berli awıl puqaralar jıyınına Shadımurat Idaev, Jolımbet Seytimbetov, Dáwletbay Qaliylaev, Baxıtbay Áliev, Áwezbay Yusupbaev, Tolıbay Qálenov hám basqalar aqsaqallıq etti^[2].

Shegaraları

APJ Qamısarıq, Pashenttaw, Taza jol, Qosterek awıl hám Gújimli mákan puqaralar jıyını menen shegaralasqan^[2].

Awılları

«Baxıtlı» awıl puqaralar jıyını óz quramına 19 awıldı birlestiredi: Aqtoǵın, Qulman, Sermanjap, Abbas Keneges, Arshan, Aqmańǵıt, Qarasıyraq, Shúyit, Abbasqaraǵan, Arsarı, Jambas jap, Nókerkól hám t.b^[2].

Tanımalı insanlar

APJ aymaǵınan shıqqan tanımalı insanlar:

Esemurat Berdimuratov — qaraqalpaq lingvistii;
Srajatdin Axmetov — qaraqalpaq ádebiyattanıwshısı;
Orazbay Berdimuratov — ximik, professor;
Álmurat Elmuratov — biolog, biologiya ilimleriniń doktorı;
Jańabay Mamutov — jámiyetlik isker;
Siysenǵaliy Seksenbaev — oqıtıwshı;
Jańabay Jumaniyazov — jámiyetlik isker;
Arzayım Axmedova — pedagogika ilimleriniń doktorı;
Serimbet Seytimbetov — filosofiya ilimleriniń kandidatı;
Qállibek Ismaylov — oqıtıwshı;
Qurbangúl Ámetova — shıpaker;
Allamurat Xojasov — awıl xojalıǵı ilimleriniń kandidatı.

Derekler

↑ Joy nomlari qisqacha izohli lug'ati
1 2 3 4 5 6 7 8 9 10 11 12 13 14 15 16 . Шымбай-Шахтемир шежиреси. «Avangard-baspa», 2024 — 378-383 bet.

Sırtqı siltemeler

[1] Joy nomlari qisqacha izohli lug'ati

[Kenesbay-2] 1 2 3 4 5 6 7 8 9 10 11 12 13 14 15 16 . Шымбай-Шахтемир шежиреси. «Avangard-baspa», 2024 — 378-383 bet.

[1]

[2]