Botakól

Botakól — Qaraqalpaqstan Respublikasındaǵı kól. Qaratereń kóliniń batısında, onnan 5 km uzaqlıqta jaylasqan. Botakóldiń ornı awlaqlıqtan ibarat. Jaskúlgen qumlı shóli menen oralǵan. Qubladan-batısqa,arqa-shıǵısqa jónelgen. Uzınlıǵı 16 km, eni arqasında 800–900 metr, qublasında 1,2 km, ortasha shuqırlıǵı 2–3 metr, eń shuqır jeri 4 metr. Kóksuw salması hám artezian suwlarınan toyınadı. Suwdıń jıl dawamında túrli muǵdarda quyılıwı sebepli júzesi de turaqlı emes. Minerallasıw dárejesi 1 litr suwda ortasha 12—16 g. Qırǵaqlar qıya, qırǵaqqa jaqın jerleri qamıslıq. Balıqshılıqta paydalanıladı.