Christian Dior
| Tuwılǵan sánesi | 21-yanvar 1905 |
|---|---|
| Qaytıs bolǵan sánesi | 24-oktyabr 1957 (52 jasta) |
Christian Dior (21-yanvar 1905, Granville, Manche – 23-oktyabr 1957), ataqlı francuz moda dizayneri, pútkil dúnyaǵa dańqı shıqqan Christian Dior moda uyiniń tiykarshısı sanaladı.
Erte balalıq dawiri
[redaktorlaw | derekti redaktorlaw]Fransuz couturieri, Christian Dior 1905-jıldıń 21-yanvar sánesinde Normandiyanıń Granvil qalashasında tuwılǵan. Onıń ata-anası qalashadaǵı bay hám ózine toq insanlardan bolǵan. Bolajaq couturierdiń ákesi ximyaliq tóginlerdi islep shiǵarıwshı óndirislik basqarmanıń baslıǵı, al anasi bolsa úy biykelik qılǵan. Dior bes jasqa tolǵan waqıtta onıń shańaraǵı Parijge kóship ótedi. Jas Dior balalıq dáwirinen baslap arxitektor bolıwdı árman etken, biraq onıń ata-anası óz balasın diplomatiya tarawı wákili sıpatında kóriwdi qálegen edi. Sol sebepli jas Dior ata-anasınıń qálewi bolǵan Parijdegi Erkin Siyasiy Pánler Mektebine (Ecole des Sciences Politiques) oqıwǵa tusedi. Biraq Diordıń diplomatlıq xizmetke degen qızıǵıwshılıǵı bolmaǵanlıǵı sebepli bul oqıw onıń ushın waqıttı mánisiz ótkeriwden basqa hesh nárse emes edi. Siyasiy pánlerdi hám xalıq aralıq huqıqtı ózlestiriwdiń ornına Dior hár qiyli kórgizbelerge hám muzeylerge barıp óziniń mádeniy dúnyasın arttırıp barǵan. Sonıń menen bir qatarda ol qosıqshılıq hám súwretshilik tarawı sırların ózlestirgen.
Moda álemine birinshi qádemleri
[redaktorlaw | derekti redaktorlaw]Diordıń mádeniyatqa hám kórkem-ónerge degen qızıǵıwshılıǵı onı 1928-jılı óziniń jeke mádenyat gallereyasın ashıwǵa alıp keldi. Bul gallereyada Deren, Matiss, Picasso hám taǵıda basqa mádeniyat hám kórkem óner tarawınıń kózge kóringen wákilleriniń saylandı miynetleri orın alǵan edi. Biraq 1930-jıllarda baslanǵan qarjı krizisi bul gallereyanı pul menen támiynlep turǵan Diordıń akesi ushın da sátsiz bolıp, gallereyanıń jawılıwına alıp keldi. Bul waqiyadan soń, Dior jeti jıl dawamında áwmetsiz hám qıyın kunlerdi bastan keshiredi. Qıyınshılıqlar hám olardıń arqasında arttırılǵan miynetlik tájiribe aqırı óz paydasın beredi. Sebebi 1936-jılı Dior Franciyanıń jetekshi gazetalarinan biri bolǵan Le Figaroǵa moda tarawı boyınsha súwretler sızıwshı (fashion illustrator)qániyge bolıp jumısqa ornalasadı. Óz kásibin tez ózlestirgen Dior endi óziniń sızǵan súwretlerin basqa da moda tarawı boyınsha qániygelesken jurnal hám gazetalarǵa usınıp óz abroyın asıradı. Sonıń arqasında Dior sol dáwirdiń belgili couterieri Robert Piguetke shákirt túsip ol menen bir jıl dawamında birge islesedi.