Indonez tili

QARAQALPAQ WİKİPEDİASININ' MAG'LIWMATI

Indonez tili (óz atı - Bahasa Indonesia) — avstroneziya tillerinen biri. Indoneziyada rásmiy (1945-jıldan) hám xalıqlar aralıq sóylesiw tili esaplanadı. Bunnan tısqarı, ol Shıǵıs Timorda da jumısshı til dárejesine iye.

Kúndelikli turmısta, túrli esap-sanaqlarǵa kóre, 30 dan 50 millionǵa shekem adam paydalanadı. Bul tilde sóylewshilerdiń ulıwma sanı 200 millionǵa jaqın.

Indonez tili XX ásirdiń birinshi yarımında Golland Ost-Indiyasında regionda ádette "frank tili" retinde isletilgen malay tiliniń ádebiy kórinisi retinde qáliplesti. "Indonez tili" ataması 1928-jılda Jaslar Kongresinde qabıl etilgen hám az-azdan "malay tili" atamasın qısıp shıǵarǵan.

Jazıw imlası latın álipbesine tiykarlanǵan.

Tildiń indonezshe atı Bahasa Indonesia bolıp tabıladı, lekin mámleket sırtında ol geyde nadurıs ápiwayıǵana "baxasa" dep ataladı, yaǵnıy "til" degen mánisti ańlatadı. Morfologiyalıq dúzilisine qaray, bul til agglyutinativlik tillerge jatadı.