Qaraqalpaqstan Respublikası mámleketlik gerbi
Qaraqalpaqstan Respublikası Mámleketlik gerbi — Ózbekstan Respublikası quramındaǵı suveren respublika — Qaraqalpaqstan Respublikasınıń rásmiy nıshanlarınan (bayraǵı hám gimni menen birge) biri[1]. Qaraqalpaqstan gerbi 1993-jıl 9-aprelde respublika Joqarı Keńesiniń XII sessiyasında mámleketlik gerbi haqqındaǵı nızamı qabıllanǵanda tastıyıqlanǵan[2]. Qaraqalpaqstan Respublikasınıń Mámleket gerbi Qaraqalpaqstan Respublikasınıń suverenli mámleket ekenligin ańlatadı[3]. Gerb ataqlı sovet, qaraqalpaq hám ózbek xudojnigi Jollıbay Izentaev sızılması menen Ózbekstan gerbi tiykarında jaratılǵan[4].
Qaraqalpaqstan gerbi Ózbekstan gerbine júdá uqsaydı hám ámelde onı bóleklerge bólip, kóshirip alǵan. Bul bolsa eki respublikanıń birliginen dárek beredi. Qaraqalpaqstan gerbinde toq aspan kók tawlar ústinen shıǵıp atırǵan quyash hám respublikanıń áyyemgi tariyxı hám mádeniyatınıń tımsalı bolǵan zardushtiylerdiń Shılpıq qalası, Ámiwdárya hám Aral teńizi súwretlengen bolıp, olardıń oń tárepinde salı masaqları, shep tárepinde bolsa ashılǵan paxtanıń ǵóreklerinen ibarat gúldáste menen oralǵan. Gerbtiń joqarı bóleginde qırları toq sarı reńde bolǵan kók segizmúyeshlik, onıń ishinde aq reńdegi juldız hám yarım ay súwretlengen[3]. Gerbtiń orayında qanatları jayılǵan ápsanawiy qus Qumay sáwlelengen. Gerbtiń tómengi bólegindegi gúldástede respublika mámleketlik bayraǵına hám orayında „QARAQALPAQSTAN“ (yamasa „ҚАРАҚАЛПАҚСТАН“) jazıwı jaylasqan[2]. Paxta hám salıdan ibarat gúldáste Ózbekstan hám Qaraqalpaqstan bayraqları túsirilgen lentalar menen baylanısqan.
Derekler[redaktorlaw | derekti jańalaw]
- ↑ „Конституция Республики Каракалпакстан — Статья 1“ (ru). Официальный сайт Жокаргы Кенеса Республики Каракалпакстан — parliamentrk.gov.uz. 1-noyabr 2018-jılda túp nusqadan arxivlendi. Qaraldı: 1-noyabr 2018-jıl.
- ↑ 2,0 2,1 „QARAQALPAQSTAN RESPUBLIKASI’NI’N’ MA’MLEKETLIK GERBI“.
- ↑ 3,0 3,1 „Qoraqalpog’iston Respublikasining davlat gerbi“.
- ↑ „Художники Каракалпакстана. Жизнь любил как настоящий художник“ (ru). erkinkarakalpak.uz. 22-dekabr 2018-jılda túp nusqadan arxivlendi. Qaraldı: 1-noyabr 2018-jıl.
Siltemeler[redaktorlaw | derekti jańalaw]
- „Qaraqalpaqstan Respublikasi’ ma’mleketlik belgileri“ (kaa). Официальный сайт Совета Министров Республики Каракалпакстан и портал Государственной власти Республики Каракалпакстан— sovminrk.gov.uz. 4-noyabr 2018-jılda túp nusqadan arxivlendi. Qaraldı: 1-noyabr 2018-jıl.
- „Каракалпакстан“ (ru). heraldicum.ru. 17-sentyabr 2015-jılda túp nusqadan arxivlendi. Qaraldı: 1-noyabr 2018-jıl.