Rayxan Saparova
| Rayxan Saparova Xalmuratovna | |
|---|---|
| Tuwılǵan sánesi | 15-aprel 1948-jılı (76 jasta) |
| Tuwılǵan jeri | Nókis qalası |
| Ákesi | Xalmurat Saparov |
| Anası | Sulıw Allamuratova |
Rayxan Saparova - Ózbekstan hám Qaraqalpaqstan xalıq artisti.
Ózbekstan Respublikası teatr ǵayratkerleri awqamı Qaraqalpaqstan Respublikası aymaqlıq bólim baslıǵı, Ózbekstan hám Qaraqalpaqstanda xızmet kórsetken artist, Ózbekstan hám Qaraqalpaqstan xalıq artisti Saparova Rayxan Xalmuratovna.[1]
Ómirbayanı
[redaktorlaw | derekti redaktorlaw]Rayxan Saparova 1948-jılı 15-aprel kúni Nókis qalasında Ózbekstanda xızmet kórsetken hám Qaraqalpaqstan xalıq artisti Xalmurat Saparov hámde Ózbekstanda xızmet kórsetken hám Qaraqalpaqstan xalıq artisti, Hamza atındaǵı mámleketlik sıylıqtıń laureatı Sulıw Allamuratovalardıń shańaraǵında dúnyaǵa kelgen.[2]
1963-jılı Nókis qalasındaǵı Glier atındaǵı muzıka mektebiniń pianino bólimin tamamlaǵan.
1971-jılı Tashkent mámleketlik teatr hám súwretshilik institutınıń drama teatr hám akterlıǵı bólimin qızıl diplom menen tamamlap Qaraqalpaq mámleketlik muzıkalı teatrında aktyorlıq lawazımında jumıs islep baslaydı.
Dóretiwshiligi
[redaktorlaw | derekti redaktorlaw]Rayxan Saparova óziniń dóretiwshilik dáwirinde túrli rollerdi atqarǵan hám xalqımızdıń jaǵımlı aktyorına aylanǵan.
Onıń atqarǵan rollerine keletuǵın bolsaq, T.Qayıpbergenovtiń “Jumagúl” spektaklinde Turdıgúl, K.Yashinniń “Yolchi yulduz”ında Gulasel, T.Seytjanovtıń “Meni sudlańlar”ında Aygúl Atabaeva, S.Xojaniyazovtıń “Súymegenge súykenbe”sinde Xansha, S.Xojaniyazovtıń “Maman biy”inde ómirlik joldası, A.Begimov hám T.Allaniyazovtıń “Ǵárib ashıq”ında Hurlixa, T.Seytjanovtıń “Beruniy”de Gúliy, U.Umarbekovtıń “Óz arzası menen”de Zumrad, G.Goriniń “Atı óshsin”de Klementina, O.Ioselianidıń “Arbań awdarılmasın”da Bala, A.Abdulliniń “On úshinshi predsedatel'”inde birinshi keńesgóy, Sh.Rashidovtıń “Júrektiń otı sónbes”inde Báhár, Q.Matmuratovtıń “Bir úyde eki ómir”inde Gúlzar, T.Seytjanovtıń “Áwesek”te Áwesek, S.Axmadtıń “Kelinler qoǵalańı”nda Muxayo, I.Sultannıń “Bilmey bastım tikendi”de Gulchehra usaǵan ráńbáreń rolleri menen tamashagóylerdiń kewlinen orın alıp, miynetkeshligi hám izleniwshiligi menen teatrdaǵı tájriybeli ustaz aktyorlardıń itibarına alındı.
Ol “Qaraqalpaqfilm” kinostudiyası tárepinen túsirilgen “Tank”, “Qaysar qız”, “Magiya” filmlerinde hám televidenie arqalı berilgen “Jigittiń ıǵbalı bolsın”, “Ómir sabaqları”, “Órmeshek”, “Bir dostıń bolsın”, “Turmıs mektebi” filmlerinde unamlı obrazlardı jaratıwǵa erisken.
Rayxan Saparova K.Raxmanovtıń «Kelin» spektaklinde Aysha, P.Tlegenovtıń «Analar»ında Gúlzira, M.Karimniń «Ay tutılǵan túnde» spektaklinde Zubarjat obrazların jaratıwda ózinde bolǵan bar talantın ámelde paydalanıp tamashagóylerdiń júreginen orın alıwǵa eristi.
Ol Azerbayjan, Tyumen oblastında Tashkent, Moskva, Qızılorda, Tatarstan, Daǵıstan, Qazaqstan Respublikalarında bolıp ótken Qaraqalpaqstan mádeniyat hám kórkem óner kúnlerinde belsene qatnastı.
Sıylıqları hám miynet jolı
[redaktorlaw | derekti redaktorlaw]1971-1986-jılları Qaraqalpaq mámleketlik muzıkalı teatrında artist,
1977-jılı Nókis qalası Keńesiniń 143-okrug deputatı,
1988-jılı Nókis qalası Keńesiniń 55-okrug deputatı,
1990-2000-jılları Ózbekstan teatr dóretiwshileri awqamınıń Qaraqalpaqstan bólimin basqardı.
1986-2000-jılları S.Xojaniyazov atındaǵı Qaraqalpaq mámleketlik jas tamashagóyler teatrında direktor,
2000-2005-jılları S.Xojaniyazov atındaǵı Qaraqalpaq mámleketlik jas tamashagóyler teatrında artist,
2005-jıldan baslap húrmetli dem alısta.
2020-jılı Qaraqalpaqstan Respublikası Jámiyetlik Nuranıylar Keńesi aǵzası.
2021-jıldan baslap Ózbekstan Respublikası teatr ǵayratkerleri awqamı Qaraqalpaqstan Respublikası aymaqlıq bólim baslıǵı laӯazımında miynet etpekte.
2022-jıldan baslap Qaraqalpaqstan Respublikası Máhálle hám shańaraqtı qollap-quwatlaw ministrligi, Nuranıylar Jámiyetlik Keńesi “Kempir apalar mektebi” Respublika Keńesi Baslıǵınıń orınbasarı.
2022-jıldan baslap Jaslar isleri boyınsha agentligi Qaraqalpaqstan Respublikası baqarması janındaǵı “Nuranıylar Keńesi” aǵzası.
1974-jılı Qaraqalpaqstan Respublikası Joqarı Keńesiniń “Húrmet Jarlıǵı”,
1977-jılı 6-aprelde Qaraqalpaqstanda xızmet kórsetken artist,
1979-jılı Qaraqalpaqstan Jaslar sıylıǵınıń laureatı,
1980-jılı 28-aprelde Qaraqalpaqstan xalıq artisti,
1982-jılı Moskva qalasında Oraylıq mádeniyat xızmetkerleri kásiplik aӯqamınıń “Húrmet Jarlıǵı”,
1993-jılı 28-yanvarda Ózbekstanda xızmet kórsetken artist,
1998-jılı 26-avgustda Ózbekstan Xalıq artisti,
2020-jılı 20-avgusta “Miynet nuranıyı” III dárejeli kókirek belgisi,
2022-jıl 8-noyabrde Ózbekstan Prezidentiniń Pármanı menen “Ózbekstannıń Konstituciyasınıń 30-jıllıǵı” estelik belgisi,
2023-jıl 3-martta Qaraqalpaqstan Respublikası Joqarı Keńesi Prezidiumınıń “Ardaqlı nuranıy” kókirek belgisi menen sıylıqlanǵan.