Paxta arna kanalı

Paxta arna kanalı — Qaraqalpaqstan Respublikasındaǵı áyyemgi topıraq, ózenli kanal. Uzınlıǵı 27,6 km, túbiniń keńligi 20–28 m,shuqırlıǵı 3,3—4,3 m, kanal boyı qashınıń keńligi 2–10 m. Suw ótkeriw qábiliyeti 80 m³/s Ámiwdáryadan suw aladı. Házirgi suw alıw imaratı 1957-jılda payda bolǵan shandorlı tosıqlar menen támiyinlengen 5 kózli (har biriniń eni 3 m) temir-beton tórtmúyesh quwırlardan ibarat. Túyemoyın gidrouzeli dárwazasınan 30 km (dáryanıń shep jaǵasındaǵı Tashsaqa kanalınıń bas imaratınan 1 km) tómeninde, qırǵaqtan 4,5 km uzaqlıqta jaylasqan. Dáryadan suw kanalǵa jiberiw ózeni arqalı jetkerip beredi. Kanaldan suw 5 suw shıǵarǵısh (Buzjap, Amirabad, Baǵjap hám basqalar) hám 30 ǵa jaqın nasoslar járdeminde bólistiriw kanalları hám salmalarǵa uzatıladı.

Ámiwdáryanıń Túyemoyın gidrouzelinen Qaratawǵa shekem bolǵan oń jaǵasında — Tórtkúl rayonında 37,1 mıń ga, Beruniy rayonında 7,01 mıń ga eginzarlar Paxta arna kanalınan suwǵarıladı.