Júweri gúrtik
| Júweri gúrtik | |
|---|---|
 Tabaqqa tartılǵan júweri gúrtik | |
| Túri | qamırlı awqat |
| Milliy asxana | Qaraqalpaq asxanası |
| Tiykarǵı komponentleri | júweri unı, kartoshka, geshir, gósh, piyaz |
| Basqa komponentleri | paxta mayı, suw |
| Uqsasları | Gúrtik |
Júweri gúrtik — qaraqalpaq asxanasında júweri unınan tayarlanatuǵın milliy awqat. Ol Qaraqalpaq asxanasında keń tayarlanatuǵın awqatlar qatarına kiredi. Bul awqat, ádette, besbarmaq penen aljastırıladı.
Tayarlaw procesi
[redaktorlaw | derekti redaktorlaw]Júweri unı, duz, qaynaǵan ıssı suwdan qamır qarıladı. Un Qaraqalpaqstan aymaǵında turaqlı túrde ósetuǵın júweri dáninen tayarlanadı. Awqat ushın maydalanıp, domalaq formaǵa keltirilgen piyaz, sonday-aq kartoshka hám geshir qosılǵan gósh aralaspası kerek boladı. Awqat ushın, ádette, jańa soyılǵan túyetawıq góshi paydalanıladı.
Bul awqat bir qaraǵanda pelmenge uqsap ketedi[1][2][3]. Iylengen qamırdan domalaq tárizdegi gúrtik islenedi, gúrtikte barmaqtıń izleri qalıp qoyadı. Gúrtikti góshli sorpada qaynatıp, pisirip aladı. Tayar bolǵan gúrtik súzip alınadı.
-
Júweri unınan qamır qarıw -
Iylengen qamırdı tiyin formasına keltiriw -
Tiyin formasına keltirilgen qamır -
Awqattıń duzlıǵın tayarlaw -
Tayar qamırdı pisiriw -
Tayar bolǵan, tabaqqa tartılǵan júweri gúrtik
«Júweri gúrtik» kúni
[redaktorlaw | derekti redaktorlaw]
2023-jıldıń 25-fevral kúni túrli social tarmaqlar arqalı jámiyetshilik tárepinen «Júweri gúrtik» kúnin Qaraqalpaqstan Respublikasında keń bayramlaw ǵayratı jergilikli xalıq tárepinen qollap-quwatlanǵan. Sonnan keyin Xojeli rayon hákimligi, sonıń menen birge, Turizm hám mádeniy miyraslar ministrligi, Qaraqalpaqstan Respublikası Aspazlar awqamı, Nókis qalası 1-sanlı qánigelestirilgen mádeniyat mektep jámááti járdeminde dáslepki márte «Júweri gúrtik» kúni bayramlanǵan. Júweri gúrtiktiń eń úlken porsiyası Nókis qalasında jaylasqan prezident mektepte tayarlanǵan. Prezident mekteptegi taǵamdı tayarlaw procesinde 20 túyetawıq góshi, 35 kg júweri unı hám 15 kg biyday unı paydalanılǵan. Tayarlanǵan tamaq diametri 3,5 x 2,5 metr ólshemde tayarlap alınǵan tabaqqa súzilgen[4]. «Júweri gúrtik» kúnin Rossiya, Qazaqstan, Qırǵızstan, Qubla Koreya hám basqa mámleketlerde jasawshı qaraqalpaq belsendileri de birge bayramlaǵan[5].
Derekler
[redaktorlaw | derekti redaktorlaw]- ↑ Ėtnografii︠a︡ karakalpakov XIX-nachalo XX veka: (materialy i issledovanii︠a︡) (ru). Izd-vo "Fan" Uzbekskoĭ SSR, 1980.
- ↑ «Жугери гуртик | Etnos» (ru). Qaraldı: 7-oktyabr 2023-jıl.
- ↑ «Ўзбекистонда илмий-амалий тадқиқотлар мавзусидаги конференция материаллари.pdf». 24-aprel 2022-jılda túp nusqadan arxivlendi. Qaraldı: 7-oktyabr 2023-jıl.
- ↑ «NUKUS SHAHRIDAGI PREZIDENT MAKTABIDA JO'XORI GURTUK (JÚWERI GÚRTIK) FESTIVALI TASHKIL ETILDI» (25-fevral 2023-jıl). Qaraldı: 7-oktyabr 2023-jıl.
- ↑ «Foto: Qoraqalpog‘istonliklar «Juo‘yeri gurtik» kunini nishonladi» (uz-Latn) (27-fevral 2023-jıl). Qaraldı: 7-oktyabr 2023-jıl.
| ||||||||||