Marjan Xalmuratova
| Marjan Xalmuratova | |
|---|---|
| Tuwılǵan sánesi | 1939-jılı |
| Tuwılǵan jeri | Moynaq |
| Qaytıs bolǵan sánesi | 2014-jılı |
| Qaytıs bolǵan jeri | Almatı qalası |
| Kásibi | Qaraqalpaqstan xalıq artisti |
| Sıylıqları | Doslıq ordeni |
| Ataqları | Qaraqalpaqstan xalıq artisti |
Marjan Xalmuratova (кирил. Маржан Халмуратова) - Qaraqalpaqstan xalıq artisti. Doslıq ordeniniń iyesi.
Ómirbayanı
Marjan Xalmuratova 1939-jılı 15-iyulde Qaraqalpaqstan Respublikası Moynaq rayonında balıqshı shańaraǵında dúnyaǵa kelgen. Ol jaslıǵınan kórkem ónerge qızıǵıwı joqarı bolǵan. Mektepte oqıp júrgen waqıtlarınan baslap háwesker dógereklerge qatnasıp, spektakllerde rol oynap jaslıǵınan kórkem ónerge jaqın bolǵan. Balalıq dáwiri Moynaqta ótken ataqlı aktrisa jaslıǵınan ata-anasınan ayırılıp, ájapası Baǵdash penen birge Nókis qalasına kóship kelgen. Mektepti pitkergennen keyin muzıkalı uchilishege kirip, Nókis qalasındaǵı Jas tamashagóyler teatrına jumısqa kirgen. Sol waqıtları Keńes Manatay-ulı Isaev penen tanısıp, oǵan turmısqa shıǵadı. Olardıń shańaraǵında 5 perzent (2 qız, 3 ul) bar. Barlıq perzentleri joqarı bilim aldı. 1984-jılı kúyewi 47 jasında kútpegen jerden qaytıs bolǵan. Balalardı tárbiyalawǵa úlken ájapası Baǵdash, keyin úlken ulı Qajımuxan kómeklesti. Jaslar teatrında biraz jumıs islegennen keyin Marjan Xalmuratova ózin úlken saxnada sınap kórdi.
Teatr
Óziniń ózgeshe tábiyiy talantınıń arqasında kastingnen tabıslı ótip, burınǵı Stanislavskiy atındaǵı (házirgi Berdaq atındaǵı Qaraqalpaq mámleketlik akademiyalıq muzikalı teatrı) teatrǵa súwretshi bolıp jumısqa kirgen. Kórkem ónerge degen muhabbatı onı Berdaq teatrınıń saxnasına shıǵıwına túrtki boldı. Marjan Xalmuratovada sózsiz tábiyiy talant bar edi hám pútkil ómirin teatrǵa arnadı. Tamashagóy rejissyor oylaǵan atmosferanı dál seziniw ushın ol hárbir rolge ózgeshe ıqlas baǵıshladı. Marjan Xalmuratova tek talantlı aktrisa retinde ǵana emes, sonıń menen qatar ol ǵayratlı, batıl, principshil hám uqıplı qaraqalpaq hayalınıń simvolı.
Rolleri
Marjan Xalmuratova “Súymegenge súykenbe”degi Gúlsánem (S.Xojaniyazov), “Kúygelek kózli yar”daǵı Dilara (T.Seytjanov), “Jaylawda toy” - Gúlsánem (R.Eshimbetov, N.Eshmatov), “Qayın ene”de - Afat (M.Shamlaxov), “Kelinler qozǵalańı” - Farman biybi (S.Axmad), “Jaralı júrekler”de Zernegúl (K.Raxmanov), “Jetinshi papam”da Qarshıǵa, “Sháriyar”da - Mástan (Q.Matmuratov), “Bes kúnlik dúnya” - Ólmesek (Q.Matmuratov) hám taǵı basqa da spektakllerdegi roli tamashagóylerdiń esinde máńgi qaldı.[1]
Ataqları hám sıylıqları
1977 jılı - Qaraqalpaqstan Respublikasına miyneti sińgen artisti ataǵı;
1991 jılı - Qaraqalpaqstan Respublikasınıń xalıq artisti ataǵı;
2001 jılı - “Doslıq” ordeni menen sıylıqlanǵan.
Shańaraǵı
Házirgi waqıtta Marjan Xalmuratovanıń Gúljaxan, Qajımuxan, Gúlistan, Timur, Radik atlı 5 perzenti bar. Hám olardan aqlıq shawlıqları bar.