Wikipedia:Bes tirek

Wikipedia, erkin enciklopediya

Wikipedianıń tiykarǵı principlerin tómendegi bes tirek arqalı ańlatıw múmkin:

  Wikipedia - bul enciklopediya: ol ulıwma hám arnawlı enciklopediyalar, jılnamalar, almanaxlar hám geografiyalıq maǵlıwmatnamalarǵa tán qásiyetlerdi óz ishine aladı. Wikipedia tártipsiz maǵlıwmatlar úyini emes. Wikipediaǵa tek anıq enciklopediyalıq maqalalar qosılıwı kerek.
 
  Wikipedia biytárep kózqarasqa iye: yaǵnıy, Wikipedia maqalalarında hesh bir kózqarasqa basqalarınan ayrıqsha pát berilmeydi. Egerde bir másele jóninde kóplegen kózqaraslar bar bolsa, Wikipediada olardıń hesh qaysısınıń tárepi alınbastan, hárbiri táriyplep ótiliwi kerek. Sonıń menen birge hár kózqarasqa baylanıslı abıroylı dereklerge siltemeler beriliwi zárúr. Eger qaysı bir maqalanıń biytárep jazılǵanlıǵı haqqında tartıs payda bolsa, bul haqqında sol maqalanıń talqılaw betinde pikir bildiriliwi kerek.
 
  Wikipedia materialları erkin: basqa sóz benen aytqanda Wikipediadan paydalanıw biypul, jáne onı qálegen adam redaktorlawı múmkin. Barlıq tekstler GFDL licenziyası astında hám tiyisli tárizde nusqalanıwı hám tarqatılıwı múmkin. Wikipedia maqalalarına bir adam xojayın bola almaydı, siz jazǵan maqala keyinirek basqalar tárepinen qálegeninshe redaktorlanıwı múmkin. Wikipediaǵa avtorlıq huqıqların buzıwshı yamasa GFDL licenziyasına tuwrı kelmeytuǵın maǵlıwmatlar qosılmawı tiyis.
 
  Wikipediada ádep-ikramlılıq qaǵıydaları bar: Wikipediashı doslarıńızdı húrmet etiń. Hátte siz olar menen ayırım máselelerde kelise almasańız da álpayım bolıń. Birewge jeke kek, ashıw, ǵárez niyet saqlamań. "Qızǵın temalar" boyınsha konsensusqa keliwge háreket etiń. Redaktorlaw konflikti payda bolıwınan saqlanıń. Basqa paydalanıwshılar menen qatnasıqlarıńızdı ayqınlastırıp alıwǵa waqıt ketirip otırmań. Esińizde tutıń, Qaraqalpaq Wikipediasında tek ǵana 4597 maqala bar, hám biz ele júdá kóp miynet etiwimiz kerek. Jaqsılıqtı gózlep is tutıń, basqalardan tek iygilikli niyet kútiń. Ashıq hám sıpayı bolıń.
 
  Wikipedianıń qatań qaǵıydaları joq, tek usı táriyplep ótilgen bes tirek bar. Joqarıda atap ótilgen bes tirektegi qaǵıydalardan basqalarına tereń itibar bermeń. Maqalalardı jazıw hám redaktorlawda batıl bolıń, siz bar qaǵıydalardan qısılıwıńız emes, kerisinshe redaktorlawdan házlik alıwıńız kerek. Bir nárseni buzıp qoyıwdan qorqpań. Barlıq maqalalardıń barlıq versiyaları saqlanıp qaladı, kerek waqıtta qálegen maǵlıwmattı qayta tiklew múmkin, sol sebepli Wikipediaǵa zálel jetpeydi. Biraq umıtpańız - bul jerde ne nárse jazsańız, barlıǵı keleshek áwladlar ushın saqlanıp qaladı.