Wikipedia:Paydalanıwshı atı siyasatı

Paydalanıwshı atı siyasatı qaraqalpaqsha Wikipediada qanday kórinistegi paydalanıwshı atların qollanıw múmkin yamasa múmkin emesligin belgilep beredi. Ádette bir paydalanıwshı akkauntınan tek bir adam paydalanıwı tiyis.

Sistemaǵa kiriw ushın jańa akkaunt jaratıw barısında paydalanıwshı atın tańlaw kerek boladı. Akkaunt járdeminde iske asırılǵan barlıq háreketler usı saylanǵan paydalanıwshı atı menen baylanısadı (akkaunt jaratpay turıp islengen redaktorlaw háreketleri paydalanıwshınıń IP-adresine tiyisli boladı). Sonıń menen birge, paydalanıwshı atın ózgertiw de múmkin. Bunıń ushın Wikipedia:Akkauntqa qayta at beriw ushın sorawlar betinde soraw jazıp qaldırıw talap etiledi.

Jańa paydalanıwshılar ushın kórsetpeler

Paydalanıwshı atıńız — bul siziń akkauntıńız hám sol akkaunt arqalı Wikipediaǵa qosqan barlıq úlesińizdi anıqlawǵa múmkinshilik jaratıwshı laqabıńız. Eger qáleseńiz, paydalanıwshı atıńız sıpatında haqıyqıy atıńızdı qollanıwıńız múmkin, biraq bunda haqıyqıy atıńız astında redaktorlawıńızdıń artınan tuwılıwı múmkin bolǵan qáwiplerden xabarıńız bolıwı kerek. Sonıń menen birge, paydalanıwshı atıńız talqılaw betlerinde pikir jazǵanıńızdan keyin qol qoyǵanıńızda da kórinedi; qollar hám olardı qalay qoyıw haqqında tolıq maǵlıwmat alıw ushın Wikipedia:Qol betin sholıp shıǵıń.

Akkaunt jaratıw barısında paydalanıwshı atıńızdı hám jasırın sózdi (akkauntqa parolińizdi) tiyisli maydanshalarǵa kirgiziń. Endi siz óz wiki akkauntıńızǵa iyesiz, oǵan joqarıdaǵı paydalanıwshı atıńız hám jasırın sóz arqalı kiresiz. Akkauntqa iye bolǵanıńızdan keyin, basqa Wikipediashılarǵa ózińiz haqqıńızda kerekli maǵlıwmatlardı usınıwdı qáleseńiz, Paydalanıwshı:XXXX (bul jerde XXXX — paydalanıwshı atıńız) dep atalǵan paydalanıwshı betin jaratıwıńız múmkin. Sonıń menen birge, siz yamasa basqa hár bir úles qosıwshı siz benen baylanısıw ushın Paydalanıwshı talqılawı:XXXX dep atalǵan betti jaratıwı múmkin.

Paydalanıwshı atıńız (ayırım texnikalıq sheklewlardi esapqa almaǵanda) qálegen belgilerden ibarat bolıwı múmkin. Biraq, bul basqa paydalanıwshılarǵa qolaysızlıq tuwdırmaytuǵın hám joybarǵa kesent bermeytuǵın at bolıwı zárúr. Tartıslı at basqa paydalanıwshılarda jaman kózqaras qaldırıwı múmkin hám bunıń aldın alıw — bul sizdiń jeke mápińiz bolıp tabıladı.

Qollanıwǵa bolmaytuǵın paydalanıwshı atları hám belgiler

Aljastırıwshı paydalanıwshı atları

Tómendegi túrdegi paydalanıwshı atlarına ruxsat berilmeydi, sebebi olardı aljastırıwshı dep esaplaw qabıl etilgen:

• administrator, byurokrat, styuard, tekseriwshi, paydalanıwshı, revizor, dástúrlewshi hám usıǵan uqsas wikidárejeni bildiriwshi atlar hám olardıń basqa tillerdegi analogları (администратор, бюрократ, стюард, проверяющий, ревизор, разработчик, administrator, sysop, oversight, steward, bureaucrat, patroller h.t.b.), jáne olardıń qısqartpaları: admin, user h.t.b.;
• bot, robot (бот, робот) kórinisindegi, yaǵnıy -bot yamasa -бот penen juwmaqlanatuǵın sózler (ádette -bot yamasa -бот kórinisi bot akkauntlarda qollanıladı hám -bot kórinisindegi ápiwayı paydalanıwshı atınıń sistemada bolıwı keleshekte bot qosıwda mashqala payda etiwi múmkin);
• Wikipedia, Wikimedia, WMF (Wikimedia Foundation), Mediawiki, Metawiki hám usıǵan uqsas Wikimedia Fondına tiyisli atamalar hám olardıń basqa tillerdegi analogları (Википедия, Викимедиа, Медиауики, Метауики h.t.b.).

Kemsitiwshi paydalanıwshı atları

Tómendegi túrdegi paydalanıwshı atlarına ruxsat berilmeydi, sebebi olardı kemsitiwshi dep esaplaw qabıl etilgen:

• Jámiyettiń normaları boyınsha jergilikli hám basqa tillerdegi uyatsız, sógis sózlerdi óz ishine alǵan paydalanıwshı atları (basqa wikipedia bólimlerinde jaratılǵan paydalanıwshı atı jergilikli tilde uyat sózge uqsaslıǵı basqa jaǵday bolıp tabıladı)
• Basqa paydalanıwshılardı abıroysızlandırıwshı atlar (mısalı, kemsitiwshi sózlerdi yamasa óz-ara qarama-qarsılıqlarǵa sebep bolıwshı sózlerdi óz ishine alǵan atlar)
• Emociyalıq reakciyanı payda etiwshi paydalanıwshı atları.

Reklamanı ańlatatuǵın paydalanıwshı atları

Tómendegi túrdegi paydalanıwshı atlarına ruxsat berilmeydi, sebebi olardı reklama dep esaplaw qabıl etilgen:

• Mekeme, topar, shólkem yamasa bir ónimniń atın anıq ańlatatuǵın paydalanıwshı atları (mısalı, TownvilleWidgets, MyWidgetsQAR.com, TrammelKórkem-ónerMuzeyi). Biraq, bunday atlardı óz ishine alǵan paydalanıwshı atlarına geypara jaǵdaylarda ruxsat beriledi.
• Kommerciyalıq maqsette web-betlerdi en jaydırıwǵa qaratılǵan yamasa jeke fizikalıq shaxstı bildirmeytuǵın elektron pochta mánzilleri hám URL-mánzilleri (mısalı, «Gójek@úlgi.com» hám «úlgi.com»).

Paydalanıw usınıs etilmeytuǵın belgiler

Tómendegi belgiler wikibetlerde ayrıqsha wazıypalardı atqaradı hám sol sebepli paydalanıwshı atın tańlaǵanda qollanıw usınıs etilmeydi: # < > [ ] | { } / @ : ;.

Siltewler

• m:Help:Unified login