Allaniyaz Óteniyazov
| Allaniyaz Óteniyazov | |
|---|---|
 | |
| Tuwılǵan sánesi | 1-iyun 1936-jılı |
| Tuwılǵan jeri | Qazayaqlı awılı, Kegeyli rayonı |
| Qaytıs bolǵan sánesi | 27-yanvar 2006-jılı (69 jasta) |
| Qaytıs bolǵan jeri | Tashkent |
| Milleti | qaraqalpaq |
| Kásibi | oqıtıwshı, baǵban, qurıwshı |
| Oqıǵan jeri | Qaraqalpaq mámleketlik pedagogikalıq institutı (házirgi Ájiniyaz atındaǵı Nókis mámleketlik pedagogikalıq institutı) |
| Iskerlik jılları | 1962—2004-jıllar |
| Sıylıqları | Ózbekstan Qaharmanı (2001), «Mehnat shuhrati» ordeni (1995) |
| Ataqları | Qaraqalpaqstan Respublikasında xızmet kórsetken oqıtıwshı (1986), Ózbekstan xalıq oqıtıwshısı (1992) |
Allaniyaz Óteniyazov (Алланияз Өтениязов; 1936-jıl 1-iyun, Kegeyli rayonı — 2006-jıl 26-yanvar, Tashkent) — Ózbekstan Qaharmanı (2001[1]), Ózbekstan xalıq oqıtıwshısı (1992), Qaraqalpaqstan Respublikasında xızmet kórsetken oqıtıwshı (1986 ), «Mehnat shuhrati» ordeni (1995).
Ómiri
[redaktorlaw | derekti redaktorlaw]1936-jılı 1-iyun kúni Kegeyli rayonı Qazayaqlı awılda diyqan shańaraǵında dúnyaǵa kelgen. 1949-jılda anası menen dayısınıń qasına — házirgi Nókis rayonı Uzınkól awılına kóship keledi. Allaniyaz Nókis qalasındaǵı mektepte oqıp júrgen waqtında úyinde miywe ham palız eginleri jetistirgen.
Ol 1956-jılı Qaraqalpaq mámleketlik pedagogikalıq institutınıń (házirgi Ájiniyaz atındaǵı Nókis mámleketlik pedagogikalıq institutı) shet tilleri fakulteti inglis tili[2] baǵdarına oqıwǵa kirip, 1962-jılı pitkeredi.
Studentlik jıllarında paxta terimine qatnasıp, hár jılı 15-16 tonnadan aslam paxta teretuǵın bolǵan. Ol 1962—2002-jılları Nókis rayonındaǵı 4-sanlı mektepte 42 jıl dawamında muǵallim bolıp isleydi.
Allaniyaz Óteniyazov ómirlik joldası menen birge bir ul, eki qızdı tárbiyalap, kámalǵa keltiredi.
Iskerligi
[redaktorlaw | derekti redaktorlaw]Pidayı ustaz 1954-jıldan baslap oqıwshılarǵa sabaq ótiw menen bir qatarda qısqı hám jazǵı demalıs waqıtlarında jalǵız baslı, járdemge mútáj 42 dana qariyalarǵa úy-jay qurıp berip, bul miynetleri ushın aqsha almaǵan[3].
Ómiri dawamında 40 turaq jay, 2 mektep, 30 orınlıq 2 balalar baǵshası, 2 medicinalıq xızmet ornı, 1 kitapxana imaratın óz miyneti arqasında qurıp pitkerip, xalıqqa sawǵa etken. Hámme qurǵan úyleri ushın jeke ózi heshqanday texnikalardıń járdemisiz 860 mıń dana gerbish quyǵan.
1999-jılı Nókis rayonında «Saqawat» fermer xojalıǵın shólkemlestirip, alma, erik, shabdalı baǵların egedi. Bul baǵlardıń miywelerinen Xojeli rayonındaǵı Mehribanlıq úyi tárbiyalanıwshıları birinshi bolıp paydalanǵan. Xojalıq aymaǵındaǵı jumıssız xalıqtıń bántligin támiyinlegen. 2000-jılı 15 gektarlıq maydanǵa baǵ egedi. Onnan tısqarı 174 shańaraqtıń úyin kapital remontlaǵan. Hámme qurǵan úyleri ushın jeke ózi hesh qanday texnikalardıń járdemisiz 860 mıń dana gerbish quyǵan[4].
Allaniyaz Óteniyazovtıń bunday miynetleri joqarı bahalanıp, oǵan «Ózbekstan selekcionerleri» húrmetli ataǵı, «Mehnat shuhrati» ordeni menen sıylıqlanǵan. Onıń ómiri hám iygilikli jumısları haqqında 3 film islengen. Allaniyaz Óteniyazovtıń miynetleri dúnyada teńsiz atanıp, «Ginnes rekordları» kitabına kirgizildi.
Allaniyaz Óteniyazov 2006-jıl 26-yanvarda Tashkent qalasında qaytıs bolǵan.
Sıylıqları
[redaktorlaw | derekti redaktorlaw]- Ózbekstan Qaharmanı (2001)
- Ózbekstan xalıq oqıtıwshısı (1992)
- «Mehnat shuhrati» ordeni (1995)
- Qaraqalpaqstan Respublikasında xızmet kórsetken oqıtıwshı (1986)
Derekler
[redaktorlaw | derekti redaktorlaw]- ↑ Oʻzbekiston Respublikasi Prezidentining PF-2918-sonli Farmoni
- ↑ Yangi O'zbekiston — maktab ostonasidan boshlanadi [Izomaterial]: kitob-albom/ Xalq ta'limi vazirligi -Toshkent : 2021., 2021.
- ↑ Nukuslik-muallim
- ↑ Saxovatda oʻtgan umr yoki qoraqalpoq hotamtoyi
Sırtqı siltemeler
[redaktorlaw | derekti redaktorlaw]
| |||||||
