Prenov Barlıqbay Baraqbaevich

Prenov Barlıqbay Baraqbaevich 1954-jılı Qaraqalpaqstan Respublikası, Kegeyli rayonında pedagog shańaraǵında tuwılǵan, milleti qaraqalpaq, tórt perzenttiń ákesi. Ol 1978-jılı Ózbekstan milliy universitetiniń matematika fakultetin «Matematikalıq analiz» qánigeligi boyınsha tamamlaǵan.

Miynet jolı

Qaraqalpaq mámleketlik universiteti

B.B. Prenov Qaraqalpaq mámleketlik universitetinde assistent lawazımınan óziniń miynet jolın baslap docent, kafedra baslıǵı, fakultet dekanı, universitet ishki qadaǵalaw bólimi baslıǵı, universitet oqıw bólimi baslıǵı lawazımlarında úlken juwapkershilik penen miynet etti. Ol matematika fakulteti dekanı (1997-2005-jj.) bolǵan dáwirde fakultet studentleri «Informatika» hám «Matematika» pánlerinen respublika dárejesinde ótkerilgen olimpiadalarda sıylı orınlardı alǵan bolıp, usı dáwirdegi bilimli studentler jetik qánigeler bolıp jetisip, házirgi kúnde respublikamızdıń ilim-pán tarawınıń rawajlanıwına óziniń úleslerin qosıp kelmekte.

Akademiyalıq licey

B. Prenov 2005-jıldıń may ayınan baslap 2012-jıldıń noyabr ayına shekem Qaraqalpaq mámleketlik universiteti janındaǵı Akademiyalıq liceydiń direktorı lawazımında isledi. Akademiyalıq licey oqıtıwshılarına jaratıp berilgen shárayatlar hám oqıw-tárbiya jumıslarına qaratılǵan ayrıqsha itibar nátiyjesinde pán olimpiadalarınıń Qaraqalpaqstan Respublikası basqıshında komanda esabında hár dayım 1-orındı iyelep keldi. Akademiyalıq liceyden usı dáwirde úsh oqıwshı qız «Zulfiya» atındaǵı mámleketlik sıylıqtıń laureatı boldı.

Nókis mámleketlik pedagogikalıq institutı

B.B. Prenov 2012-2016-jıllar aralıǵında Ájiniyaz atındaǵı Nókis Mámleketlik Pedagogikalıq Institutınıń rektorı lawazımında isledi. Rektorlıq iskerliginiń dáslepki dáwirlerinen-aq jámáátte salamat sociallıq, ruwxıy hám psixologiyalıq ortalıqtı jáne de jaqsılawǵa, pútkil komandanıń tatıw, awızbirshilikli hám bir maqsetke qaray háreket etiwi ushın zárúrli bolǵan barlıq shárayatlardı hám imkaniyatlardı jaratıp berdi.

Ol 2016-jıldıń dekabr ayınan Ájiniyaz atındaǵı Nókis Mámleketlik Pedagogikalıq Institutınıń «Matematikanı oqıtıw metodikası» kafedrası baslıǵı lawazımında islep kelmekte.

Ilimiy iskeriligi

B.B.Prenov 1987-jılı 01.01.01.-«Matematikalıq analiz» qánigeligi boyınsha “Применения многомерного логарифмического вычета к формулам суммирования” temasındaǵı kandidatlıq jumısın qorǵaǵan. Ol 2021-jılı “Kóp ólshewli kompleks analizde integral usıllardıń qollanıwları” temasındaǵı doktorlıq (DSc) dissertaciya jumısın jaqlap, 01.01.01.-«Matematikalıq analiz» qánigeligi boyınsha fizika-matematika ilimleriniń doktorı ilimiy ataǵın aldı.

B.B.Prenov 2001-jıl noyabr-dekabr aylarında Germaniyanıń DAAD grantı jeńimpazı sıpatında Potsdam universitetinde, 2006-jıl may-iyun aylarında Ózbekstan Respublikası Prezidentiniń «Ist'edod» fondı grantı jeńimpazı bolıp, Rossiyanıń Sibir federallıq universitetinde ilimiy-pedagogikalıq qánigeligin arttırǵan. Ol 2016-jıl noyabr hám 2018-jıl aprel aylarında Rossiyanıń Sibir Federal universiteti, 2018-jıl iyun ayında Kuban mámleketlik universitetinde, Matematika hám fundamentallıq informatika instituti menen dúzilgen shártnama tıykarında ilimiy-pedagogikalıq stajirovkada bolǵan.

B.B.Prenov Ózbekstan Respublikası joqarı hám orta arnawli bilimlendiriw ministrligi Mırza Uluǵbek atındaǵı Ózbekstan milliy universitetinde OT-F4-37-29 (01.06.2017-jılı), Berdaq atındaǵı Qaraqalpaq mámleketlik universitetinde OT-F4-4-27 (03.01.2020-jılı) sanlı grantlardıń orınlawshı toparında ilimiy jumıslar menen shuǵıllanǵan.

B.B.Prenov 2016-jıldan usı kúnge shekem 1 sabaqlıq, 1 oqıw qollanba, 4 metodikalıq qollanba hám 30 dan artıq respublika hám xalıqaralıq jurnal, konferenciyalarda ilimiy maqalaları menen qatnasqan. Joqarı attestaciya komissiyası sistemasındaǵı, recenziya talap etiletuǵın jurnallarda 8 maqala, sonıń birewi Rossiyada basıp shıǵarılǵan. Sonday-aq, birewi akademik A. Sadullaev usınısı menen Ózbekstan ilimler akademiyası lekciyalarında (DAN) basıp shıǵarılǵan. Ulıwma alǵanda B.B.Prenov 100 den artıq ilimiy-metodikalıq hám oqıw-metodikalıq jumıslardıń avtorı. Ilimiy jumısları Amerika, Germaniya, Rossiya, Ukraina mámleketleriniń abıroylı jurnallarında baspadan shıqqan.

Sıylıqları

B.B. Prenov 2013-jılı «Qaraqalpaqstan Respublikası Xalıq bilimlendiriw aǵlası», 2014-jılı «Ózbekstan Respublikası Xalıq bilimlendiriw aǵlası», «Ózbekstan Respublikası ǵárezsizliginiń 20 jıllıǵı», «Ózbekstan Respublikası ǵárezsizliginiń 25 jıllıǵı», «Ózbekstan Respublikası ǵárezsizliginiń 30 jıllıǵı» sıylıqları hám kóplegen húrmet jarlıqları menen sıylıqlanǵan.

Siyasiy iskerligi

B.B. Prenov II shaqırıqta Qaraqalpaqstan Respublikası Joqarǵı Keńesine deputat bolıp saylanıp, Qaraqalpaqstan Respublikası Joqarǵı Keńesiniń Reglament hám deputatlar etikası komissiyasın basqardı, Joqarǵı Keńes prezidiumı aǵzası boldı.

Ol jetik pedagog, tereń potenciallı alım sıpatında ilim hám pán tarawına úlken úlesin qosıp, jurtımızdıń gúllep-jasnawı ushın xızmet etip kelmekte.

Derekler